Ұлттық бірыңғай тестілеудің қорытындысында біздің облыс республика бойынша екінші орын алды. Орташа балл — 78,7. Сынаққа қатысқан 5573 оқушының 861-і (15,4 пайыз)100 және 100-ден жоғары балл жинады. «Алтын белгі» аттестатына үміткер 312 түлектің 109-ы (34,3 пайыз) білімдерін дәлелдеді. Шектеулі балл жинай алмағандардың үлесі — 21,5 пайыз. Былтырмен салыстырғанда «екілік» алғандар да аз емес: 4 пайызға өсті. Бұл  — 333 бала «2» алды деген сөз. Осындай төмен көрсеткіштерге қарамастан, біздің облыстың білім сапасы еліміздің өзге өңірлерімен салыстырғанда жоғары көрсеткішке ие.

«Арай» бағдарламасы ауылдағы жас-кәріге түгел қолдау көрсетіп отыр. Осы бағдарламаның арқасында жақында мал шаруашылығы жөніндегі 19 жоба,  5 шаштараз, 12 тігін цехы, 7 жиһаз жасау шеберханасы, 9 нан және кондитер өнімдерін шығаратын цех, құс өсіру жөніндегі 3 жоба, 4 компьютерлік орталық және тағы да басқа 95 жоба жүзеге асырылады.

Апта басында Достық үйінде «Арай» әлеуметтік серіктестік бағдарламасының 95 жеңімпазына гранттар сертификаттары тапсырылды.

Өткен аптаның жұма күні Тахауи Ахтанов атындағы облыстық драма театрында медицина қызметкерлерінің кәсіби мерекесіне арналған салтанатты жиын өтті. Мерекелік шараға облыс әкімі Архимед Мұхамбетов қатысты.

Бүгінгі күні  облыстың денсаулық сақтау саласында 30 мыңнан астам адам еңбек етеді. Салтанатты шарада облыс әкімі Архимед Мұхамбетов медицина қызметкерлерін төл мерекесімен құттықтап, сөз сөйледі.

Әйтеке би ауданы Қарабұтақ селосында  Елбасы Нұрсұлтан Назарбаевтың биылғы «Әлеуметтік-экономикалық жаңғырту —  Қазақстан дамуының басты бағыты» атты Жолдауына және  мемлекеттік қызметтің сапасын арттыруға байланысты ауданаралық кеңес өтті. Жиынға облыс әкімі аппаратының басшысы Константин Петров, ҚР Мемлекеттік қызмет істері жөніндегі агенттігі Ақтөбе облысы бойынша басқармасының бастығы Нұрлан Сүйінбаев, облыстық ішкі саясат басқармасының бастығы Зәпен Жұмабаева және Қарғалы, Ырғыз, Хромтау аудандарына қарасты селолық округтердің  әкімдері  қатысты.